SPORT

瘋狂世界盃補習社(十四)
主辦國又如何 捧盃無咁易

3, JULY, 2018

就咁樣,俄羅斯堅係如佢所願,寧願分組賽打自己落次名,返去莫斯科球場嘅87,000名國民面前踢返場「主場雞」賽事,那管面對的是傳球成功率極高的西班牙。主場就是主場,Sure Win呀!結果真係成功晉身8強。不過,當你以為主辦國殺入決賽最後仲捧埋隻大力神盃是理所當然的話,咁我就只能答句:「年輕人,你實在太年輕啦!」

無可否認,主辦國喺主場出戰,的確係打高幾皮波,遙遠嘅歷史告訴我們,許多傳統強隊其所贏取的首個世界盃,都是靠主場之利贏得的,1930年的烏拉圭;1934年的意大利;1966年的英格蘭;1978年的阿根廷,都是透過主辦世界盃而邀請其他國家隊替佢哋助慶。當然,此4支國家隊在當代嚟講本身都是強隊本色,贏波都尚算合理吧 (其實30及34年呢兩屆我都唔係好熟,你問返你阿爺好過)。如是者,以我出世後的年份計算,82年世界盃之後所舉辦的主辦國,到目前為止都只得98年的法國成功掄元,其餘屆數主辦國最終都係事與願違。所以話主辦國又如何吔,最後咪又係替人作嫁衣裳。

90年世界盃,意大利在主場出戰,一路過關斬將殺入四強,面對今非昔比的阿根廷,史基拉斯上半場入波領先,以為小勝格入決賽,完場前都要俾阿根廷追平打加時,戰至互射12碼又輸俾哥高查只得爭季軍,宿命也;94、02及10世界盃的主辦國太弱,唔講也罷;06年之德國又是遭遇同一命運,同樣戰至四強惡鬥意大利,打至加時戰才失守以0-2飲恨,又是宿命也;至於去屆的巴西,大家理應記憶猶新吧!悲劇歷史繼續重演,四強對陣德國,沒有尼馬的巴西變咗隻「無腳嘅雀仔」,半場已被日耳曼人KO 5球,情何以堪。主辦國終究只能望門輕嘆,其實又唔好講到世界末日,雖知成功舉辦一屆世界盃已是盤必賺無蝕的生意,要攞哂彩又真係講唔過嘅。所以話,呢個世界好公平,無理由獎金又係你,獎品又要俾埋你嘅,唔通主辦國就可以橫行無忌咩?係咪咁講先。