SPORT

瘋狂世界盃補習社(十六)
假如巴治奧沒有受傷 (94年FF版)

3, JULY, 2018

94年美國世界盃係我睇得最如癡如醉的一屆,儘管嗰屆嘅開波時間差到離哂大嫂,有乜理由大部份開波時間會在凌晨2點幾3點?因為嗰屆世界盃喺美國舉行,大會又要遷就返歐洲人,所以我哋呢班低端亞洲人就只能夠遷就其他人,去捱更夜嘅夜波。不過,我還是懷念這屆世界盃,懷念羅馬里奧交俾白必圖,白必圖利用佢嘅個人技術連過兩關然後一射入網;還有,我更懷忘巴治奧,ole ole ole ole,如果一切可以推倒重來,巴治奧在決賽前夕沒有受傷,你話幾好呢。

話巴西係嗰屆大熱,其實應該話屆屆都係,但自從70年三奪雷米金盃後已經無再拎過,所以當年巴西「黃金組合」羅馬里奧及白必圖夾唔夾到?賽前都係未知之數。

不過,由巴治奧領軍嘅意大利,開波前就真係係威係勢啦。首先,意大利後防擁有全歐洲最固若金湯的防線,巴里斯、馬甸尼、泰索迪、阿柏天尼,中前場又有干地、甸奴巴治奧、鄧納東尼、悉路尼、馬些路、蘇拿,最重要還有93年當選世界及歐洲足球先生的羅拔圖巴治圖。

女球迷喜歡他,都是衝著他可愛的馬尾。講返賽事先,分組賽頭場竟意外輸俾愛爾蘭後,第二場對挪威開波初段仲有龍門柏魯加被罰紅牌離場,黑過墨豆!在許勝不許敗的情況下,領隊沙基決定調走巴治奧離場,我還記得巴治奧被知要退下火線那刻的眼神彷彿告訴大家:「你唔L係換我呀?呢場要我入波喎。」也許,沙基就是孤注一擲,要全隊知道無咗巴治奧之下,入波就要靠大家,最終才冒險在完場前小勝挪威。如是者三輪分組賽過後,微妙的結果是4隊同得4分,意大利僅以較佳的第3名晉身次圈,而巴治奧本人係仲未為球隊入過1球波,認真濕滯。

其實,意大利以第3名姿態晉級,懶理是否走線,其實此著的確係靚。若然首名出線,8強要硬碰德國;若然次名出線即要立即對荷蘭,都是場場硬仗。相反,現實情況是意大利在打入決賽前,3個對手均是當年實力一般的尼日利亞、西班牙和保加利亞,已足夠讓及時回勇的巴治奧輕取5球。只可惜對保加利亞時他拉傷腿筋,決賽前對巴西有傳只暫列後備,但最後仍紮住上陣。時也命也,假如巴治奧健全披甲上陣,至少他不會全場無咗影;至少12碼唔會飛機;至少佢唔會射完波垂頭喪氣。一念天堂一念地獄,意大利新金童之名,非佢莫屬呀。