SPORT

瘋狂世界盃補習社(十八)
總有出頭天 那些年的北歐波

10, JULY, 2018

雖然英格蘭喺8強過到瑞典呢關,但平心而論呢隊維京人嘅表現其實不賴,如果伊巴謙莫域無退出國家隊嘅話,有個咁強勁嘅球員做牽制能力,英格蘭要出線或者都仲有故講。儘管去到4強階段,歐洲球隊佔咗3席,而一眾北歐球隊已經悉數打柴,不過講返那些年的北歐波,你依稀又記得多少?

其實,北歐一帶的國家唔係好多,但在近半百的足球發展史中亦擔當了重要角色。

先講瑞典先,至少佢係眾多北歐國家之中,唯一一隊曾經打入過世界盃決賽,喺1958年做主辦國嗰屆,決賽以2-5負於當年有球王比利的巴西。然而往後嘅日子,幾乎接近30年時間整個北歐恍如進入了「冰河時期」,北歐足球簡約到連世界盃決賽周此等大賽都接近零曝光。不過,踏入90年代北歐足球又開始蠢蠢欲動,最先起動者又係瑞典,今次雖然無1958年咁巴閉,但憑著92年舉辦歐洲國家盃晉身4強,僅以2-3負於德國而已,有哂交代,陣中球星如布連、達連、堅尼安達臣、拉維利已逐漸打起,為94世界盃最終贏得季軍奠定良好基礎。

不過該屆歐國盃,你點都估唔到個最後焦點落咗喺因替補南斯拉夫內戰被FIFA取消參賽資格的另一「北歐神話」丹麥,神奇之處係「冷手執個熱冠軍」,這也是迄今唯一北歐國家最佳的大賽成績。其實,印象中丹麥喺86世界盃都曾經中興過,決賽周分組賽被編入與西德同組都可以贏到對方,仲以3戰全勝出線16強,惜以1-5被西班牙大炒無耐16強行人止步,當年丹麥當打嘅就係喺祖雲達斯同法國球王柏天尼拍住上嘅米高勞特立啦。至於去到98年則到挪威發威了,雖然該屆世界盃球隊最盡只能打到16強,但名留青史嘅係分組賽成功擊敗巴西,亦是森巴兵團自1966年以來再度喺決賽周分組賽輸波,咁你話威唔威?(其實都想講下芬蘭,曾幾何時列馬倫都算擔起成支國家隊,但始終無緣打入世界盃決賽周)。

好啦,知道大家都話冰島幾時出場?係啦係啦,兩年前歐國盃呢支北歐以北嘅國家隊點樣一鳴驚人,打到入淘汰賽擊敗英格蘭晉身8強唔使我多講。人口少過香港,但都可以在幾年間由世界排名100+跳升至最新的18位,加上其驚天地泣鬼神嘅Viking Clap(維京戰吼)慶祝方式,10年間由「魚腩」變「黑馬」,呢個演變確實充滿戲劇性之餘又夠勵志,即使今屆決賽周未能突破分組賽,但能夠打和阿根廷;取得世界盃決賽周的第1分和第1個入球,已經超級難能可貴矣,你睇有10幾億人口嘅贏国,都無咁好成績呀。