SPORT

瘋狂世界盃補習社(十二)
政治足球 波砵有戰事

1, JULY, 2018

早前世界盃分組賽塞爾維亞對瑞士場波,完場前瑞士個沙基利轟入致勝一球,取得最後勝利。睇返慢鏡,佢入完波後個慶祝動作原本無人知道點解?雙手比出老鷹展翅,原來事後有好多故仔講,仲要不知不覺間牽涉到政治層面。今次我都要小心啲講嘢。

話說,我之前都寫咗一篇「睇世界盃學世界歷史」嘅拙文,已經道出你睇波愈睇得耐,就會發現好多時事局勢,例如邊個國家打輸仗消失咗?邊個國家新興建國等等?而有關呢場波,塞爾維亞同瑞士本應河水不犯井水,點知都要喺世界盃咁大型嘅舞台上搞事。事源替瑞士入波嗰兩位仁兄,原來本身並非土生土長的瑞士人,而是20幾年前居住於科索沃境內的阿爾巴利亞人,雙親當年因避開戰事最終跑到瑞士尋求庇護並定居,而當年係邊個趕佢哋一家人走?咪就係塞爾維亞人囉,咁大家明白啦!原來,他們在入波後擺出的手勢,是阿爾巴尼亞國旗上的「雙頭雄鷹」,代表著他們與科索沃、阿爾巴尼亞的深刻連結。一切的新仇舊恨,在理應追求「理想與和平」的緣茵場上真的難以定斷誰對誰錯,我等呢班花生友只能唱句「難為正邪定分界」也。

除咗塞爾維亞與瑞士之國仇之戰以外,早前已分組賽出局的伊朗,亦曾無緣無故被逼與無份參加決賽周的美國「宣戰」,來一場自98年世界盃決賽周分組賽硬碰硬的「美伊大戰」之後的小型戰役。話說,由於美國總統侵侵早前宣布退出於2015年簽訂的「伊核協議」後,意味重新向伊朗展開經濟制裁,部分原本得到「一剔」贊助的伊朗球員突然無得穿該品牌的波砵,球員最後竟要用自己嘅方法搵鞋著,認真慘豬豬。所以你話,下次邊個同我講:「我想踢波呀!」唔該叫佢收聲,睇多一節國際新聞先好講啦!