SPORT

瘋狂世界盃補習社(十九)
後生仔 是咪未夠爐火純青?

14, JULY, 2018

喺香港,廢老喜歡對著後生仔講:「你班廢青無鬼用,想當年我乜乜乜」。其實本人作為夾心階層(即係中坑啦),真係想講句「今日吾驅歸……」唉,廢事講多錯多,都係一人少句。相反,作為職業足球員,正所謂落場無父子,即使美斯咁好腳法;丙朗咁好身手,最後都未必敵得過班精靈活潑嘅後生仔,一招盲拳都可以打死無師傅。所以話,後生仔係咪未夠爐火純青呢?唔使問陳金城,我首先舉腳話「唔係」。

今屆世界盃,會唔會係後生仔嘅世界呢?聽晚決賽至知。不過,睇返四強嘅23人大軍名單平均年齡,法國及英格蘭均不約而同是25.6歲。克羅地亞年紀最大,為27.4歲(不過夠韌力呢家嘢又真係唔講得笑);比利時亦有27.1歲。決賽組合法國對克羅地亞,即係25.6歲對27.4歲啦,或者你會講相差得嗰兩年,唔係爭好遠啫。如果你真係咁諗,一証明你應該好耐無落場踢過波;二証明你身體機能鍛煉得好似丙朗咁完美;三證明你根本唔係人類,新陳代謝速度與外星人無異。男人心聲:「差一年,好遠㗎啦!」不過講咁多都無謂,宜家呢一刻都唔知邊個可以捧得起大力神盃嘛?

不過,睇返近年捧盃嘅國家隊,你自會發現一個好微妙嘅數據分析,就係平均年齡有愈來愈後生嘅趨勢,94年的巴西27.4歲;98年的法國26.7歲;02年的巴西26.1歲;06年的意大利28.2歲(係呢年有啲反高潮嘅);10年的西班牙25.9歲;14年的德國25.7歲,證明捧盃最好趁後生,你睇今屆眾多提早出局的傳統強隊平均年齡都比較大,例如分組賽已出局的德國平均年齡為26.7歲,西班牙為28歲,阿根廷仲恐怖,29歲,所以你話16強對法國硬碰硬,即係29歲同25.6歲鬥法,一個麥巴比高速放電梅開二度,班阿根廷後防追都追唔切,食塵咁濟,兼俾佢追平自球王比利喺1958年締造嘅「淘汰賽階段單場入多過1球的年輕球員」紀錄,唔好唔記得佢今年得19歲咋,大把前途,當年06世盃美斯以18歲357日成為該屆最年輕入球者都無佢碌到入決賽咁威水。如今老矣,講乜都無用,又一證明「寧欺白鬚公,莫欺少年窮」!呢個事實係幾咁殘忍,所以話你以後寧想得罪廢老定廢青?識揀啦。