SPORT

瘋狂世界盃補習社(十三)
罷踢風波 非洲堅守5席

3, JULY, 2018

咩叫世界盃?當然是全世界所有想參加的國家都可參與的大型足球盛事啦!(其實首先你要係國際足協成員國先得)。不過,唔好以為每個洲份嘅國家都好恨參加呀,喺1998法國世界盃舉行前夕,幾乎因為某個洲份差點爭取不到他們要求的席位問題而曾經揚言罷踢世界盃!邊個咁把炮竟敢在國際足協頭上動土?咪就係唔識死嘅非洲足協囉。

事情其實好簡單,眼見世界盃已經變成一盤穩賺的大生意,國際足協亦有意發大嚟搞,喺98年世界盃就決定將晉身決賽周的席位,由94美國世界盃決賽周的24支國家隊,增加至32支,變相多了8個出線席位。

好啦,講到席位,其實就等同太公多咗嚿豬肉,大家都想來分一杯羹。作為國際足協,而總部又設喺歐洲,自然喺歐洲人話事啦,佢哋原先最希望將呢堆多餘的豬肉分俾歐洲及美洲國家 (根據歷屆世界盃的成績而言都係呢兩個洲份贏哂),所以亞洲及非洲想增加席位根本係難過登天,FIFA最初構思係亞洲和非洲只額外多一席。不過,非洲足協當時已明言,必須由原本的3個非洲國家出線席位,改為5個才答允改制方案,更表明「沒有非洲國家參與的世界盃就不是真正的世界盃」,仲叫大家睇返近屆非洲國家參與世界盃,幾可跟世界強隊周旋,82年及90年的喀麥隆已是最佳例子;還有94年尼日利亞的超霸鷹本色,已証明黑色力量在世界盃舞台上的存在價值。若然國際足協唔應允的話,結果就得一個──唔join世界盃。

最後國際足協亦唯有順其意向,大家才會見到98世界盃開始有更多非洲國家的出現。所以你話,幸福真係要自己去爭取嘅,當然首要條件係,你要有好籌碼。