瘋狂世界盃補習社(十七)
贏波3分制 攻呀攻快搶攻

10, JULY, 2018

稿嘅呢一刻,在尚未開打4強之際,今屆賽事已經踢咗60場波,錄得157個入球數字,計返場均都有2.61入球,呢個數字相比起上屆巴西世界盃的場均入球2.67仲有少少距離,但係再對比返2006及2010兩屆分別錄得的2.3及2.27之差劣數字,今屆賽事之可觀性可以話「算係咁」,尤其是完場前先入波都有好幾次,確實係近屆世界盃來講稱得上既緊張又刺激的其中一屆。

作為球迷,你睇波當然想睇入波;但係入為落場嘅球員,佢哋嘅心態又是否跟我們一樣?或者,而家係,但以前可能未必係。沒錯,曾經有一段時間,球隊崇尚守勢足球,控球在腳而不積極參與進攻,總之立於不敗之地先。呢個情況喺90意大利世界盃尤甚,睇返當年場均入球只錄得2.21球,係歷屆、沒錯,歷屆世界盃最少入球的一屆,到今時今日仲未有一屆可以刷新低(當然大家都唔想有破紀錄的一屆),大量0-0又或是打和後不再主動向前進攻的戰略比比皆是,連鎖反應下形成消極、沉悶的踢法,也是90世界盃至今給人詬病的主因。

因此,踢完90世界盃過後,FIFA倡議將贏波2分制改例(沒錯呀,當年贏波得2分咋,咁唔攻等打和都無咁蝕底),改為贏波有3分,提升幅度達100%,講到明「贏波多1分,打和無著數」。想贏波,就要鬥多波入,贏咗波代表你直接出線的機會大增,雖知道當年世界盃得24隊踢,分6組進行的分組賽,晉身16強的球隊除了每組首兩名外,還要計算6組中最佳成績的4隊,真係計分都計到撓哂頭。結果,呢個改制係絕對明智兼湊效,睇返之後一屆的94世界盃場均入球即刷新高,錄得2.71球。大家嘅踢法風格有所改善,進攻足球有market,所以話呢個世界點會死錯人呀。