SPORT

瘋狂世界盃補習社(七)
擺烏龍隨時命仔不保

23, JUNE, 2018

艾斯高巴,一位名不經傳的哥倫比亞後衛球員。他,本來藉藉無名,卻在一夜之間成為全球所有報章雜誌的「風雲人物」,可惜下場卻以悲劇告終。時為1994年,哥倫比亞昂然殺入美國世界盃決賽周,點解話昂然呢?因為當屆南美洲區外圍賽,哥倫比亞就係一路奇兵過關斬將,更曾經在主場以5-0狂數阿根廷,在世界盃舉行前夕,人稱「烏鴉口」的球王比利更表示,睇好哥倫比亞可以歷史性晉身四強,能與當年一眾勁旅分庭抗禮。

可惜,或者人算不如天算,世界盃第一場分組賽對羅馬地亞,「意外地」敗陣;接著第二場對主辦國的美國,哥倫比亞應該以為自己「有得執」,誰知就是艾斯高巴的烏龍球最後慘負出局,國家隊提早執包袱。其實大熱倒灶向來屢見不鮮,只是此子在返國後因一次在酒吧與旁人爭吵議論,期間有人不忿因他的烏龍球被累及輸錢而將他槍殺。因為一個烏龍球而無咗條命仔,真係點講都不值錢。

嗱嗱嗱,今屆首個紅牌就係哥倫比亞呀,中場球員山齊士摩蘭奴禁區內手球輪咗個12碼俾日本,最後以寡敵眾輸波了。當然,分組賽雖然未踢完,或者哥倫比亞可以再行前多幾步,但係萬一真係分組賽出局,我還是好心建議山齊士摩蘭奴為安全之計,唔好隨團返回哥倫比亞老家好了,直接由俄羅斯漏夜搭飛機返西班牙球會愛斯賓奴提早報到好啦。