TIMEPIECE

泥地王新錶
懸浮機芯格網造型

12, OCTOBER, 2020

過去周末,泥地王拿度(Rafael Nadal)係法國網球公開賽男單決賽,擊敗世界「一哥」祖高域(Novak Djokovic)封王,贏得生涯第13個法網冠軍,仲追平一生競敵費達拿所保持嘅20個大滿貫紀錄。網球嘅嘢,我哋唔多熟,所以恭喜佢之餘,就講講早前 Richard Mille 為佢特別研發嘅泥地王新錶 RM 27-04。

法國網球公開賽男單決賽拿度以直落三盤6:0、6:2、7:5 擊敗世界「一哥」祖高域封王。而佢係法網第三圈比賽時已經手戴Richard Mille為紀念同佢合作10周年,已特別推出限量版新錶「RM 27-04」。Richard Mille一直為拿度研發既輕巧而堅靭的陀飛輪腕錶,今次就以一條鋼織起一個保護網,加上全新以38.5%碳纖維複合獨特材質TitaCarb,其結構可為懸浮係網格上嘅陀飛輪機芯承受12,000G大氣壓力。同事形容,莫講話打網球,若然拿度佩戴住隻錶跳降落傘,理論上也一樣運作正常。

成隻錶重量只有30克,設計意念嚟自網球拍,錶面係網球拍的網紋狀,係由一條直徑只有0.27mm鋼纜編織而成。呢個五級鈦合金製成嘅中空錶圈,鋼纜總共穿過錶圈達38次,先係10點鐘位置以經過PVD處理嘅5N紅金張力器拉緊固定。當然,錶面仲印咗拿度個名。「RM 27-04」定價係105萬美元,全球限量生產50隻。