POP CULTURE

一個人過聖誕:煲戲清單
編輯部嚴選 5 套必睇聖誕電影

19, DECEMBER, 2019

誰又騎著那鹿車飛過,忘掉投下那禮物給我......其實寂寞,就如自己一個吃火鍋;難道寂寞,就連爛透神劇亦照播。無錯,一個人會上癮嘛,一個人過聖誕仲過癮呀。其實自己一個更開心,以下5套由我哋編輯部「鹽選」的聖誕電影,最適合一路睇一路戥人開心,自己形影隻單又算得上甚麼呢?

No. 5 - 《The Holiday》(緣份精華遊)

講聖誕電影,怎可能少得《The Holiday》,俊男美女又靚景,要酒有酒要女有女,仲有可能係全盛時期嘅Jude Law及Cameron Diaz玩難捨難離,同場又加映影后Kate Winslet配諧星Jack Black互相大鬥演技,兩女互換居所過聖誕,意外改變愛情運,成就一個粉紅色嘅聖誕假期。

 

No. 4 - 《Breakfast at Tiffany's》(珠光寶氣)

點解會揀呢套?理由好簡單,就係一邊睇呢套電影,會一邊想像夢想的破滅和重生。相信不少女子睇呢套電影,對可能會像柯德莉夏萍(Audrey Hepburn)一樣,對Tiffany & Co.有種莫名的著迷,每次經過櫥窗定必都會佇足注目,心裡想著「我都想有錢走入鋪頭買曬所有單品!」可是現實是殘酷的,作為普通打工仔,還是乖乖地把Tiffany & Co.放在神聖位置好了。不過,就如電影所言,Tiffany的大門永遠為大家打開。就算20出頭的你不敢走入專店試戴珠寶也好,你也總會找到接近Tiffany的機會。大家都不妨為自己許下一個聖誕願望吧。

 

No. 3 - 《Home Alone》(寶貝智多星)

如果你係來自7、80後嘅影迷,肯定對麥哥利高堅(Macaulay Culkin)呢位童星曾經留下深刻形象,佢細細個主演的《Home Alone》更是家傳戶曉的聖誕歡笑電影。阿媽出門唔記得帶個仔出街,人仔細細嘅佢要出盡法寶對付兩個賊仔,過程驚險又笑料百出,度過難忘聖誕!若果發生在現時的話,仲唔俾人告「疏忽照顧兒童」?

 

No. 2 - 《Love Actually》(真的戀愛了)

邊個無睇過《Love Actually》度過聖誕的話,真係好打有限啦。電影由幾個圍繞聖誕嘅故事組成,包括英國首相愛上助手同小朋友Cute爆示愛,段段情節都勁Sweet。當中Andrew Lincoln暗戀死黨老婆Keira Knightley多時,聖誕用紙牌示愛一幕絕對經典,「To me , you're perfect」,睇十次喊十次,仲加入戇豆先生大放笑彈,拍出溫暖人心又令人會心微笑嘅聖誕經典愛情片!

 

No. 1 - 《Sex & the City》(色慾都市)

睇《Sex & the City》除了睇到「色香味」之餘,同時睇到女人與女人的友誼永固,有時會吵咀,然而吵咀過後又會摟作一團,互相鼓勵對方,這套由神劇重新改編的電影版,點解成為編輯部「孤獨睇戲團」的第一位,就是單單一幕Miranda在聖誕夜孤單在家心情低落時,半夜被她來電吵醒的Carrie沒有發脾氣,冒著大雪搭地鐵趕過去陪她,冬夜的寒冷瞬間融化在溫暖的友情中。寫到呢度,我都想即刻開返隻碟重溫多次。